Ўзга ёр деб кетса жуфти ҳалолингиз, Кўз ёш тўкиб сўлдирмангиз жамолингиз, Ҳудойимга келмас фақат малолингиз, Яратганнинг ўзи сизга тоқат берсин!
Лойқалатманг умрингизни ирмоқларин, Эр келганда беркитинг қалб титроқларин. Аччиқ бўлур билурман ёр фироқлари, Яратганнинг ўзи сизга тоқат берсин!
Наф бўлурми ўқ отилса сўзингиздан, Қаҳр эмас, меҳр боқсин кўзингиздан, Нигоҳини узолмасин юзингиздан, Яратганнинг ўзи сизга тоқат берсин!
Сабр этинг Оллоҳ берур кафолатни, Хўп билурсиз бу иншою-ҳикоятни. Эрдан эмас Ҳақдан тиланг адолатни! Яратганнинг ўзи сизга тоқат берсин!
Қозиғини топур ҳар от, мисол учун, Захар сочиб безитмоқлик айтинг, нечун, Шошиб юрсин доим сизнинг висол учун, Яратганнинг ўзи сизга тоқат берсин!
Киролмайман мен ўзганинг терисига, Уйлансалар майли, ундан нарисига, Ҳалол бўлса ҳоҳ ёшу, ҳоҳ қарисига, Яратганнинг ўзи сизга тоқат берсин!
Синовини берур Оллоҳ суйганига, Кўнурмизда пешонага ўйганига, Дунё иши арзимас жон куйганига, Яратганнинг ўзи сизга тоқат берсин!
|