Кимдир кечиримли инсоннинг яшаши осон деса, бошқаларнинг фикрича, иродали инсонларгина узр сўрашга қодир эмишлар. Аксарият холларда эса қилган хатомизни тан олишга ғурур тўсқинлик қилади. Аччиқ бўлса-да, тан олиш керак, бу ҳақиқат! Бугун биз машҳурларга мурожаат этиб,бу борадаги фикрлари билан қизиқдик. ҳар куни турфа воқеалар, турли хил одамлар билан тўқнаш келадиган иштирокчиларимиз бирон айб иш қилсалар, уни қандай тўғирлайдилар? ҳафа қилган инсонларининг кўнглини олишда қайси усуллардан фойдаланадилар?
«АЙЁРОНА УСУЛИМНИ ҚЎЛЛАЙМАН» Аюб ШАҲОБИДДИНОВ, режиссёр:
– Биласизми, аслида мен учун узр сўраш жуда оғир вазифалардан бири. Айбим бўлса, кечирим сўрашдан қочмайман. Аммо бунга анча вақт ўзимни тайёрлаб, кейин қадам қўяман. Кўп ҳолларда эса аразлашиб қолган одамим билан ҳеч нарса бўлмагандай гаплашиб кетишга ҳаракат қиламан. Бу менинг айёрона усулларимдан бири.
«АТРОФИДА ПАРВОНА БЎЛАМАН!»
Хосила РАҲИМОВА, Ўзбекистонда хизмат кўрсатган артист:
– Мендан кўнгли қоладиган даражада ҳеч кимни ҳафа қилмаганман. Аммо беайб парвардигор. Баъзан ўйламай гапириб кимнидир ранжитиб қўйсам, айбимни шу заҳоти тан олиб, тезда кечирим сўрашга ошиқаман. Чунки кимдир билан хафагарчиликда юриш менга хос эмас. Ўйлаб сиқилавераман. Ўша одам менга илгаргидек яхши муносабатда бўлмагунича атрофида парвона бўламан (кулади). Ким билади дейсиз, балки «гирдикапалаклигим» жонига текканидан ҳам кечириб юборишар...
«СОВҒА БЕРАМАН!»
Анвар СОБИРОВ, хонанда:
– Кимнидир хафа қилган бўлсам, қуруқ кечирим сўраш билан кифояланмайман. Кўнглини юмшатадиган, менга нисбатан юзага келган салбий ўй-хаёлларини унутишга сабаб бўлувчи арзирли совға-салом оламан. ҳа, айтганча, совғанинг катта кичиклигини ранжиган инсоннинг хафалик даражаси белгилайди (кулади). Юқорида кечирим сўраш аҳамиятсиз деганим билан, аслида, бу сўзнинг ҳам ўз ўрни бор. Айбимни «ювиш» учун совға бераётганда фақат «кечир» демасдан, қилган ишимга чин маънода пушаймон эканлигимни чиройли сўзлар билан айтаман. Ўзимдан келиб чиқиб, маслаҳат берсам, кечирим сўраётганда бу ҳолат бошқа қайтарилмаслигига суҳбатдошингизни ишонтиринг. Шунда гина-кудуратлар унут бўлади.
«РУҲИЯТИГА ТАЪСИР КЎРСАТАМАН»
Ҳусан ЖЎРАЕВ, актёр ва телебошловчи:
– Авваламбор ҳеч кимни ранжитмасликка ҳаракат қиламан. Агар билмаган ҳолда кимнидир хафа қилиб қўйсам, унинг кўнглини олиш учун ишни кечирим сўрашдан бошлайман. Сўзларим билан кўнглини юмшатгач эса кичикроқ бўлса-да совға бераман. Совғанинг қандайлиги аҳамиятсиз. Чунки мен айбимни тан олиб, унинг учун вақт ажратиб, кўнглини кўтариш учун қилган ҳаридимнинг ўзи кечиришига ёрдам беради. Бундай муносабатларда инсон психологиясини билишнинг ўзи кифоя.
«ГАП БИЛАН «ЭРИТАМАН»» Ботир ЯМИНОВ, хонанда:
–Мен ҳафа қилган инсон аёл киши бўлса дунёдаги барча ёқимли сўзларни айтишнинг ўзи етади. Ахир аёллар ширин сўзнинг гадоси, деб бекорга айтишмайди-ку. Лекин узр сўрамасдим. Билмадим, негадир бу сўзни айтолмайман. Тўғри, бир оғиз сўз. Лекин қўлимдан келмайди. Шундай бўлса ҳам шу кунгача кимнидир хафа қилган бўлсам, «кечир» сўзисиз вазиятдан чиқиб кетолганман.
«ВАЗИЯТГА ОЙДИНЛИК КИРИТМАЙМАН»
Даврон ЭРГАШЕВ хонанда:
– Табиатан гиначи эмасман. Кимдир мендан хафа бўлган бўлса ҳам аразлашиб юролмайман. Вазиятни узил-кесил ҳал қилиб, ҳеч нарса бўлмагандек гаплашиб кетавераман. Муаммонинг энг осон ва тинч йўли ҳам шу. Фикримча, агар кечирим сўраб вазиятга аниқлик киритилса, бекорга гап чувалашиб кетади.
«ЁҚТИРГАН ТАОМИНИ ПИШИРАМАН!»
Севинч МЎМИНОВА, хонанда:
– Биз аёллар кўпинча шошқалоқмиз. Бу камчилигимиздан эса аксарият ҳолларда турмуш ўртоғимиз азият чекади. Мен ҳам айнан шошма-шошарлик қилиб, ўйламай гапириб қўяман. Бундан эса умр йўлдошим ранжигани қолади. Эркаклар кўнглига йўл ошқозон орқали боради, деган гап тўппа-тўғри айтилган. Буни аразлашган пайтларимиз кўп бор синовдан ўтказганман. Биринчи ўринда айбимга иқрор бўлиб, бу иш бошқа такрорланмаслигини айтаман, кейин дастурхонга Шароф ака севиб истеъмол қиладиган таом ва пишириқларни тортаман. Қарабсизки, кўнгил хираликлар эсдан чиқади.
«ЎЗИ ГАПИРМАГУНИЧА, ИНДАМАЙМАН!»
ИМИНИ СИР ТУТГАН ИШТИРОКЧИ:
– Турмуш ўртоғим бирор ишни хато бажарса, шартта юзига айтаман. Хафа бўладими-йўқми, буниси мени қизиқтирмайди. Тўғри-да, тилёғламалик қилишнинг нима кераги бор. Мендан ранжиса, то ўзига келмагунича индамай юравераман. Барибир, ўзи гапиради. Гиначи экан, деб ўйламанг, шунчаки, тўғри гапирганимни тушунишига қўйиб бераман. Лекин менга биров хафа қиладиган гап айтса, ўша одам билан умуман тескари бўлиб қолишим мумкин. Нима қилай, сиркам сув кўтармайди-да.
МУЗАЙЯНА тайёрлади.
Manba: Zamonaviy.CoM -Saytdan olindi.
Ushbu ma'lumot http://sugdiyona.uz/ dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|