Туннелда бурғулаш, ковлаш ишлари муддатидан олдин тугатилди, дея хабар беради "Ўзбекистон темир йўллари” АЖ ахборот хизмати.
Ўзбекистон Республикаси Президентининг қарорига асосан Ангрендан Попгача қурилаётган электрлаштирилган темирйўл линиясининг 19 километрлик асосий туннелнинг иккала томонидан бурғулаш, ковлаш ишлари тугатилиб, туташтирилди.
Мазкур улкан лойиҳа "Ўзбекистон темир йўллари” акциядорлик жамиятининг тажрибали ва малакали темирйўлчилари томонидан Хитойнинг "China Railway Tunnel Group” компанияси билан ҳамкорликда амалга оширилмоқда.
Бу туннель қурилиши мураккаблиги бўйича жаҳонда биринчи саккизталикдан, узунлиги бўйича 13 таликдан жой олган, МДҲ мамлакатларидаги ягона ноёб қурилиш иншооти ҳисобланади.
Айни кунда эса пардозлаш ишлари давом этаяпти. Бугунги кунгача туннелнинг 85 фоизида пардозлаш ишлари бажарилди. Ҳа демай тажрибали темирйўлчиларимиз туннелда пўлат излар ётқизиш ва электрлаштириш, коммуникация ишларини ҳам бошлаб юборадилар.
Шуни алоҳида таъкидлаш керакки, узунлиги 123,1 километрдан иборат бўлган мазкур лойиҳанинг туннелдан ташқари 104 километрида барча қурилиш ишлари 2015 йил август ойининг сўнгги кунларида тўлиқ тугатилган эди.