Узоқ вақт давомида соғлиқ учун зарарли ҳамда семизликка олиб келувчи маҳсулотлар ичида картошка числари етакчилик қилиб келмоқда. Таркибидаги ёғ, крахмал, шакар, туз ҳамда қовуриш жараёни сабабли ушбу маҳсулот ихлосмандлари қисқа вақт ичида юрак-қон томир касалликлари, ортиқча вазн, ҳансираш ва бошқа муаммоларга дуч келадилар.
Жаҳл устида ихтиро қилинган чипслар
Картошка чипслари АҚШ курортларидан бирининг ресторанида тасодифан кашф қилинган. Ушбу рестораннинг махсус таоми – қовурилган фри картошкаси эди. Кунларнинг бирида ушбу оромгоҳда дам олиш учун келган темир йўл магнати картошка бўлакларининг қалинлиги, шу боис улар яхши қовурилмаганлигидан шикоят қилади ва таомни қайтариб юборади. Таъби нозик мижознинг бу қилиғ бош ошпазнинг жаҳлини чиқаради ва унга қасдма-қадс картошкани максимал даражада юпқа қилиб кесиб, кейин ёғга ташлайди. Натижада дафтар варағидай юпқа бўлаклар ҳосил бўлади. Бош ошпаз хўранданинг устидан кулгандай қилиб ушбу картошка бўлакларини унга тортади – нозик таъбли хўрандага эса бу таом жуда ёқиб тушади. Мана шу воқеа сабаб картошка чипслари ихтиро қилинди ва бу таом рестораннинг махсус таомига айланди.
Чипс солинган пакетлар азот билан тўлдирилган
Кўпчилик одамлар чипслар солинган пакетлар ҳаво билан шиширилган, деб ҳисоблайдилар, бироқ бу нотўғри. Ҳавонинг таркибида кислород бор, у чипсдек майин ва нозик маҳсулот учун зарарлидир. Ҳаво таъсирида чипс мазасини тезда йўқотади ва тахир бўлиб қолади.
Шунинг учун пакетлар ҳаво эмас, азот билан тўлдирилади. Азот таъсирида чипснинг мазаси бузилмай сақланади ҳамда пакетларнинг транспортировкаси учун амортизация вазифасини бажаради.
Чипслар семизликка олиб келувчи энг энг самарали маҳсулот
Танани семизликка олиб келувчи энг хавфли маҳсулотлар – бу транс ёғлардан фойдаланган ҳолда тайёрланганларидир. «Тез» углеводлар билан тўйинган юқори крахмалли маҳсулотларнинг зарари ҳам кам эмас. Ёғда қовуриш эса маҳсулотнинг устки қисмида кимёвий канцероген ўзгаришларга олиб келади. Булардан ташқари, кўп миқдордаги туз маҳсулотларнинг озуқа сифатини камайтириб, кўпроқ ейишга ундайди, натижада эса ортиқча вазн келиб чиқади.
Бу сифатларнинг барчаси чипс деб номланувчи қовурилган картошкага тегишли. Айнан чипслар таомларнинг зарарли сифатлари бўйича картошка фри ва кока–колани ҳам ортда қолдиради.