Бу ҳафта дам олиш кунлари катта ўйинларга тўла. Италия, Испания ва Англияда нафақат бугунги кун, умуман, мамлакат футболи етакчиларининг ўзаро тўқнашувлари бўлиб ўтади. Бемалол келаётган якшанбани «Классикалар куни» деб ҳам аташ мумкин. Албатта, бу номдор ўйинлар билан бир қаторда, қуйида эътироф этилмаган ҳар қандай ўйин ҳам шиддатли, томошабоп баҳсга айланиб кетиши мумкин. Ахир бу Европа!
БАРСЕЛОНА – РЕАЛ МАДРИД (24 октябрь, 19:15)
«Барселона» ўзига ўхшамаётгандек, тасаввур остида бўлса-да, аслида ҳаммаси барқарор ва тушунарли. Куман шогирдлари кучли жамоаларга ютқазишмоқда., ўртамиёналар билан қийин ўйинда ғалаба ёки дуранг, кучсизроқлардан эса, устунлик қайд этиляпти. Умуман, топ-рақибларга қарши ўйинда ғалаба қозона олмаслик тенденцияси ўтган мавсумдан бери бор – бир йил олдин ЕЧЛ гуруҳ босқичида «Ювентус» устидан қозонилган ғалабадан (3:0) кейин «Барселона» бирор марта топ-рақибни енга олмади. Месси борлигида ҳам «Атлетико», «Реал», «ПСЖ», «Бавария» каби жамоаларга қарши кечган 8 ўйинда 2 дуранг ва 6 мағлубият.
Қизиғи, «Реал» доим ҳам топ-клубга ярашадиган ўйин кўрсата олмаяпти. Баъзида «Интер», «Шахтёр», «Сельта» ва «Мальорка» каби жамоаларга қарши ишончли ғалабалар «Шериф» ва «Эспаньол» каби ўйинлардаги кутилмаган ҳисоблар билан алмашиб турибди. Яъни бу ўйин натижаси «Реал»нинг қайси ён билан уйғонишига боғлиқ – агар ўз даражасида ўйнай олса, Куман шогирдларида имконият деярли йўқдек. Умуман, охирги 4 ўзаро ўйинда «Барселона» Класикода ғалаба қозона олмаяпти. 0:0 ҳисобидаги дуранг билан бошланган ушбу серия «Реал»нинг қаторасига уч ғалабаси билан давом этмоқда.
«Реал» ғалабали сериясини давом эттирса, Испания чемпионати пешқадамига айланиб олади. Аксинча, «Барселона»нинг ғалабаси эса, уларга «Реал»ни қувиб ўтиш имконини беради. Куман шогирдлари шундай ҳолатдаки, ғалаба уларни ҳатто 2-ўринга олиб чиқиши, мағлубият эса, 9-поғонага тушириб юбориши мумкин.
Таркиблар борасида кутилмаган йўқотишлар йўқ. Жорди Альба муддатидан олдин сафга қайтгани ва сўнгги учрашувларда анча яхши ўйин кўрсатаётгани гувоҳи бўлдик. Педридан ташқари, асосий таркиб ўйинчиларидан Роналд Араухо «Барселона»га ёрдам бера олмайди, холос. Мадридликлар сафида Бэйл, Иско, Йович ва Себальосда жароҳат бор, аммо бу футболчилар тўлиқ спорт формасида бўлган тақдирда ҳам, Анчелотти уларни катта эҳтимол билан асосий таркибга туширмасди.
МАНЧЕСТЕР ЮНАЙТЕД – ЛИВЕРПУЛЬ (24 октябрь, 20:30)
ЕЧЛ 3-турини безаб берган икки энг ёрқин ўйин айнан мана шу жамоалар иштирокида бўлди. Бир хил (3:2) ҳисобида ғалаба қозонган жамоалар эмоционал жиҳатдан чўққига чиқа олишди ва унинг давомини якшанба оқшомида бўлиб ўтадиган дербида кутишга ҳақлимиз.
«Ливерпуль» майли, узоқ давом этган инқироздан чиқиб олди ва худди икки йил олдингидек формани намойиш этмоқда, яна Англияда чемпионлик учун асосий даъвогарга айланди. Аммо рақобатчилар кучли, Клопп жамоаси айни паллада очко йўқотмасдан бориши шарт. Сабаби, январь ойларида Африка Миллатлар кубоги бўлиб ўтади ва бу турнирдан энг кўп азият чекадиган жамоа айнан «Ливерпуль»дир. Садио Мане, Наби Кейта ва Муҳаммад Салоҳнинг жамоадаги ўрни беқиёс, улар эса, шу турнир туфайли 6-8 ўйинда жамоадан четда бўлишади. Олдини олиш қийин бўлган пасайишдан омон чиқиш учун эса, имкон қадар ишонч ва очко захираси билан етиб бориш мақсадга мувофиқ.
«Юнайтед»нинг ўз вазифаси бор. Роналдуга энг мос тактикани топиш, АПЛдаги натижаларни яхшилаш, футболчиларга ишончни қайтариш ва чемпионлик пойгасига қайтиш. Энг қийини, экспериментлар кучли рақибларга қарши амалга оширилиши керак, зеро «Ливерпуль»дан кейинги рақиблар «Тоттенҳэм» ва «Манчестер Сити». Катта эҳтимол билан айнан мана шу уч ўйин Сульшернинг келажагини ҳам, умуман жамоа ушбу мавсумда нималарга даъвогарлик қилишини ҳам кўрсатиб беради.
Яхши томони, ҳар икки жамоа ҳам ўйинда энг кучли таркибини тушириш имкониятига эга. Жароҳатлар йўқ ва биз айни пайтда майдонда уч нафар «Олтин тўп»га даъвогар бўлган футболчини кўришимиз мумкин. Маркус Рэшфорд «Аталанта» билан ўйинда енгил жароҳат олган бўлса-да, у қадар жиддий эмас. Айтиш мумкинки, айнан Рэшфорднинг қайтиши «Юнайтед» ўйинини айниқса, катта жамоаларга қарши осонлаштиради. Узун паслар, қарши ҳужумлар ва ҳимоячилар ортидан очилиш борасида у Гринвуддан ҳам, Санчода ҳам устун. Қайтгач, икки ўйинда умумий 90 дақиқадан сал кўпроқ майдонда ҳаракат қилган Рэшфорд 6 маротаба дарвозабонлар билан яккама-якка қолгани – ажойиб натижа. Икки марта у вазиятни голга айлантира олди.
Сульшер шу пайтгача Клопп устидан бир марта, шу йилнинг январь ойида ғалаба қозонганди. Аммо бу АПЛ эмас, Англия кубоги доирасидаги ўйин эди. АПЛда эса, икки мураббий тўқнашуви 5 бор содир бўлган – уч дуранг ва 2 марта Клоппнинг қўли баланд келган.
РОМА – НАПОЛИ (24 октябрь, 21:00)
Конференциялар Лигасида (!) Норвегия (!!) клубига 1:6 ҳисобида (!!!) бой берган Жозе Моуриньо «Рома»нинг иккинчи таркиби асосийсидан сифат борасида кескин фарқ қилиши ҳақида айтди. Одатда мураббийлар агар келажакда ҳам бу футболчилардан фойдаланиши мумкинлигини ўйласа, бундай гаплар айтмайди. Зеро, кеча майдонга тушган футболчилар ичида, масалан, Майорал ўтган мавсумда бир поғона юқори турнир бўлмиш Европа Лигаси гуруҳ босқичида тўпурар ҳам бўлган. Хуллас, Моуриньонинг янги жамоасидаги «асал ойи» бу сафар сал эртароқ якунига етган кўринади.
«Наполи» эса, ўзгача кайфиятда Римга ташриф буюради. Спаллетти жамоаси Европа Лигасида гуруҳ пешқадами бўлиб турган «Легия»ни 3:0 ҳисобида енгди, А Серияда эса, 8 ўйиндан 8 ғалабага эришиб, кучли бешликда ҳали очко йўқотмаган ягона жамоа бўлиб турибди. Аммо бошқа тарафдан, «Наполи» қулайроқ тақвимга эга бўлди, етакчи клублардан фақат «Ювентус» билан ўйнади ва у пайтларда туринликлар яхши формада бўлмай, ҳатто «Эмполи»га ҳам ютқазиб юрганди. Яъни «Рома» сафаридан сўнг ҳам ғалабали сериянинг давом этиши «Наполи»га чемпионлик йўлидаги дадил қадам бўлиб хизмат қилади.
Ўзаро ўйинларда айниқса, сўнгги йилларда «Наполи»нинг яққол устунлигини кузатиш мумкин. Римда ўтган охирги 5 ўйиннинг 4тасида меҳмонларнинг қўли баланд келган. Ўтган мавсумда ҳар икки ўйинда «Наполи» ғалаба қозонган ва «Рома» бу ўйинларда бирорта гол уришнинг ҳам уддасидан чиқмаган.
ИНТЕР – ЮВЕНТУС (24 октябрь, 23:45)
А Сериянинг марказий ўйини эса, шубҳасиз, Миланда бўлиб ўтади. Ўтган мавсумдаги чемпионликнинг асосий яратувчилари Антонио Конте ва Ромелу Лукаку кетганидан сўнг ҳам, Италияда асосий куч бўлиб қолаётган «Интер» ва қарийб бир ярим йиллик инқирозни ниҳоят бартараф этишни бошлаётган «Ювентус»…
Ҳар икки жамоа учун ЕЧЛнинг навбатдаги тури муваффақиятли кечди. «Интер» гуруҳ босқичидаги илк ғалабасига эришиб, 2-ўрин учун яхши имконият ҳосил қилиб олган бўлса, «Ювентус» ЕЧЛда 100 фоизлик натижа кўрсатаётган тўрт жамоадан бири бўлиб турибди ва плей-офф масаласини деярли ҳал қилди. Қизиғи, «Ювентус» ЕЧЛда ҳам, Италия чемпионатида ҳам сўнгги иккитадан ўйинини, жами тўрт ўйинни бир хил – 1:0 ҳисобида якунлаган. Ҳали ҳужумда ҳаммаси кўнгилдагидек эмасдир, лекин Аллегри камида ҳимояни ўз ўрнига қўя олди ва «Интер»га қарши ўйинда бу катта устунлик беради.
Аксинча, одатда мана шундай ғалабаларга уста бўлган «Интер» ўзгариб, «Аталанта»га айланиб қолгандек. Ўхшашлик либосда эмас, ўйинлардаги натижаларда ҳам – «Интер» иштирокидаги ўйинларда ўртача 4тадан ортиқ гол урилмоқда. Жамоа 23 гол билан энг сермаҳсул жамоа, бу яхши, лекин 8 ўйинда ўтказилган 11 гол чемпионлик учун курашаётган жамоа учун жуда кўп. Айниқса, «Лацио»га қарши ўйин анча оғриқли якунланди, биринчи бўлимдан сўнг ҳисобда олдинда борган миланликлар охирги 10 дақиқада икки гол ўтказиб юбориб, 1:3 ҳисобида мағлубиятга учради. Мавсумдаги илк мағлубият.
Ўзаро ўйинларга қарасак, охирги 25 ўйиндан атиги 4тасида «Интер»нинг қўли баланд келган. «Ювентус» 15 марта ғалаба қозонган. Жумладан, ўтган мавсум охирида бўлиб ўтган Туриндаги ўйин ҳам жуда шиддатли кечганди. Роналдунинг уролмаган пенальтиси, Кьеллинининг автоголи, Брозовичнинг қизил карточкаси ва «Интер» икки марта ҳисобни тенглаштирган ўйинда Куардадо 88-дақиқада пенальтини аниқ амалга ошириб, мезбонларга 3:2 ҳисобидаги ғалабани таъминлаб берганди.
ОЛИМПИК МАРСЕЛЬ – ПСЖ (24 октябрь, 23:45)
Франция чемпионатининг жорий мавсумида кимдир парижликларга рақобат қилиши мумкинлигини тахмин қилиш қийин, лекин жадвал нуқтайи назаридан айнан «Марсель» бугунги кунда «ПСЖ»нинг энг яқин таъқибчиси ҳисобланади. Жамоа 3-ўринда бораётган бўлса-да, бир ўйин кам ўтказган ва агар ўша ўйин учун ҳам очко қўшадиган бўлсак, Сампаоли шогирдлари 20 очко билан 2-ўринга жойлашишади. «ПСЖ» ҳисобида эса, 10 ўйинда олинган 27 очко бор.
Бундан 10 йил олдин, 2011 йилнинг 28 ноябрида «Олимпик» ўз майдонида «ПСЖ» устидан 3:0 ҳисобида ғалаба қозонган. Мана шу учрашувдан бери марселликлар ўз майдонида «ПСЖ»ни енга олишмаяпти. Тўғри, орада фақат бир марта, ўтган йилнинг сентябрида «Олимпик» 1:0 ҳисобида устун келган, аммо ўша учрашув Парижда бўлиб ўтганди. Демак, юлдузларга тўла Париж жамоаси устидан ғалаба қозониш учун яхши мотивация бор.
Марселликлар Европа Лигасида Римга сафар қилиб, 0:0 ҳисобида дуранг ўйнашди ва ўйинда жамоанинг деярли барча етакчи футболчилари қатнашди. «ПСЖ» ўз еврокубок учрашувини икки кун олдин ўз майдонида ўтказганини эътиборга олсак, меҳмонлар жисмоний жиҳатдан кучлироқ бўлишини тахмин қилсак бўлади. Жароҳатланганлар эса, аксинча, «ПСЖ»да кўпроқ – Неймар ва Паредес катта эҳтимол билан шерикларига ёрдам бера олмайди.
АТЛЕТИКО – РЕАЛ СОСЬЕДАД (24 октябрь, 23:55)
Шунча катта ўйинлар ҳам сизни футболдан чарчатмаса, десертига Испания футболининг классик тўқнашуви тақдим этилади. Мадрид ва Баскония тўқнашуви. Амалдаги чемпион ва турнир жадвалини айни паллада бошқариб турган жамоа баҳси.
Ҳа, балки кутилмагандир, балки «Эл Класико»дан сўнг Анчелотти шогирдлари тўплар нисбати бўйича пешқадам бўлиб олар, аммо мавсумни мағлубият билан бошлаган «Сосьедад» футболчилари ҳақиқатан ҳам ажойиб мағлубиятсиз серияни амалга оширди – барча мусобақаларда 11 ўйин. Натижада жамоа Ла Лига пешқадамига айланиб олди, Европа Лигасида ҳам ҳаммаси жойида, плей-оффга чиқиш учун яхши имконият яратилган. Тўғри, ғалабалар нисбатан камтар жамоалар устидан ва кичик ҳисобда қайд этилмоқда, аммо катта эҳтимол билан Испания чемпионатида бу йил барқарорлик энг муҳим устунликка айланса ажаб эмас. Зеро асосий фаворит саналган «Атлетико» ҳам у қадар ишончли кўринмаяпти, «Барселона» устидан ғалаба қозонилгани билан «Алавес»дан мағлубиятга учралган.
Таркибдаги муаммоларга эътибор қаратсак, баскларнинг ҳолати анчагина қийин. Жамоа етакчиси ва тўпурари Микел Ойарсабал терма жамоа ўйинларида жароҳат олди ва ўтган ўйинда ҳам шерикларига ёрдам бера олмади. Қанот ҳимоячиси Муньос эса, «Мальорка» билан ўйинда иккинчи сариқ карточкани олиб, майдондан четлатилди ва энди дисквалификация туфайли жамоага ёрдам бера олмайди. Мезбонлардан Маркус Льорентенинг майдонга тушиши сўроқ остида.
Ўтган мавсумдан фарқли равишда «Атлетико» гол уриш борасида муаммоларга дуч келмоқда. Симеоне шогирдлари сермаҳсуллик борасида 8-турдан сўнг Ла Лигада атиги 8-ўринда боришмоқда. «Сосьедад» эса, аксинча, ўтказилган 8 ўйиннинг 6тасида ўз дарвозаларидан тўп олиб чиқмаган. Дастлабки турдаги «Барселона»дан қабул қилинган 4 гол ҳисобга олинмаса, кейинги 7 ўйинда атиги 3 гол ўтказиб юборилган. Бу нуқтайи назардан, мезбонларнинг метин ҳимояни ёриб ўтишга уринишлари ва «Сосьедад»нинг жавоби – бу тўқнашувнинг энг асосий интригаси бўлади, деб тахмин қилиш мумкин.
БОШҚА ЎЙИНЛАР
23 октябрь. ЧЕЛСИ – Норвич (16:30), Арминия – БОРУССИЯ Д (18:30), БАВАРИЯ – Ҳоффенҳайм (18:30), Брайтон – МАНЧЕСТЕР СИТИ (21:30), Болонья – МИЛАН (23:45)
24 октябрь. АТАЛАНТА – Удинезе (15:30), СЕВИЛЬЯ – Леванте (17:00), Вест Ҳэм – ТОТТЕНҲЭМ (18:00)
Manba: Zamonaviy.CoM -Saytdan olindi.
Ushbu ma'lumot shoubiz.uz dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|