Бугун пандемияга қарши курашаётганларнинг олд сафида бўлаётган фидойи шифокорларни олқишлаяпмиз. Бироқ таъбир жоиз бўлса, улуғ курашда кўксини қалқон қилаётган, бу улуғ ишга озми-кўпми ўз ҳиссасини қўшаётган тиббиёт ходимлари ҳам тирик жон эканлиги, уларнинг ҳам барчамиз сингари кундалик ташвишлари, дардлари ва хасталиклари бўлиши мумкинлиги кўпчилигимизнинг хаёлимизга ҳам келавермаслиги мумкин.
Мана шундай тиббиёт ходимларидан бири, пойтахтлик 24 ёшли У.Б. илк ҳомиладорлиги бўйича оилавий поликлиникада рўйхатда турар эди. 2017 йилда туғма юрак нуқсони туфайли унинг юрагида мураккаб жарроҳлик амалиёти ҳам ўтказилганди.
У шу йил 9 апрель куни Тошкент шаҳар 4-сон клиник шифохонасининг туғруқ бўлимига "Ҳомиладорлик 1. 32-33 ҳафта. Ўткир респиратор касаллиги” ташхиси билан келган. Тиббиёт муассасасида коронавирус инфекциясига текшириш учун суртма олинган. 10 апрель куни таҳлил натижаси "мусбат” эканлиги аниқланган. Шундан сўнг, ҳомиладор аёлга ихтисослашган тиббий ёрдам кўрсатиш мақсадида пойтахтимиздаги 3-сон туғруқ комплексига оғир аҳволда ўтказилган.
Туғруқ мажмуасида мутахассислардан: кардиохирург, кардиолог, пульмонолог, инфекционист, терапевт, анестезиолог-реанематолог ва акушер-гинекологлар томонидан аёл тиббий кўрикдан ўтказилиб, зарурий текширувлардан сўнг керакли даволаш чора-тадбирлари белгилашди.
Кардиохирург томонидан туғруқни жарроҳлик йўли билан амалга ошириш тавсия қилинди. Бугун эрталаб бемор аёл вазни 3 150 грамм, бўйи 52 сантиметр бўлган ўғил бола чақалоқни дунёга келтирди. Фидойи шифокорларимизнинг тажрибаси сабаб мураккаб жарроҳлик амалиёти асоратсиз ўтиб, муваффақиятли якунланди. Ҳозирда аёлнинг ва янги туғилган чақалоқнинг аҳволи яхши, улар шифокорларнинг қатъий назорати остида.