— Ёшим 30 да. Оилалиман. Икки нафар фарзандим бор. Чамаси олти ой илгари лабим устида туклар пайдо бўла бошлади. ҳозир худдики ўсмир йигитларнинг мўйлаби сабза ургандек ҳолатга келиб қолган. Косметолог кўригига боргандим, у бу муаммони шифокор билан ҳал этишим лозимлигини айтди. Юзда ортиқча тукларнинг чиқишини даволаш қанчалар самара беради? Уни косметологик муолажалар билан йўқ қилиш мумкин эмасми?
Хуршида Ўразалиева, Тошкент вилояти.
Нима учун аёлларда мўйлов чиқади? Сабабларини ўрганамиз!
Дарҳақиқат, бу муаммодан бутунлай қутилиш учун аввало дерматолог, эндокринолог ва гинеколог кўригига бориш лозим. Нега дейсизми? ҳар бир инсоннинг жинсий белгиларини намоён этишга кўмаклашадиган андроген гормонлари мавжуд: аёлларда бу – прогестерондир, эркакларда эса тестостерон айнан шу вазифани бажаради. Қизиғи, бу иккала гормон аёл ва эркак организмида ҳам учрайди. Ягона фарқи – миқдорида. Организмда уларнинг миқдор мувозанати бузиладиган бўлса, ташқи кўринишда ҳам ўзгаришлар рўй беради. Масалан, аёлда тестостерон гормон кўпайиб кетса, ҳуснбузар тошиши, юзда ортиқча тукларнинг пайдо бўлиши, ҳайз цикли, буйрак ости безлари ва тухумдонлар фаолиятининг бузилиши ҳамда ҳомила тушиши каби ҳолатлар рўй бериши эҳтимоли ошади. Бундан ташқари юздаги ортиқча тукларга қўйидагилар ҳам сабаб бўлади:
Буғдой унидан тайёрланган маҳсулотлар ва ширинликларни ҳаддан ортиқ истеъмол қилиш; Тери касалликлари (экзема, псориаз кабилар); Анорексия (озғинлик ва овқатдан бош тортиш); Тухумдонлар поликистози; Менопауза.
Гўзалликни сақлаб қолиш ҳамда турли хасталиклардан ҳимояланиш учун таҳлил топшириш лозим.
Зарурий таҳлиллар
Мўйловларни оддий косметик муолажа билан олиб ташлаш ёки дори-дармон билан даволаш кераклиги шифокор кўригидан сўнг маълум бўлади. Унга қадар эса бемор аёл қуйидаги текширувлардан ўтиши шарт:
Бир суткалик пешоб таҳлили; Гормонлар учун қон таҳлили; Жинсий аъзолар УТТси.
Айнан мана шу таҳлилларнинг натижасига қараб, мўйловларнинг чиқиш сабаби аниқланади. Агар тестостерон миқдори меъёрдан ошиқ бўлса, уни дорилар билан даволаш талаб этилади. Бироқ гормонлар миқдори меъёрий кўрсаткични кўрсатса, унда сизга косметик муолажанинг ўзи етарли саналади.
Ўзингизга ёрдам беринг!
Гормонал фонни мувозанатга келтириш учун даволаниш курси узоқ вақт талаб этади. У тугагунга қадар эса сиз мўйловларни атрофдагиларга «кўз-кўз» қилишни истамаслигингиз аниқ. Уларни вақтинча йўқотиш учун бир қанча усуллардан фойдалансангиз бўлади.
Пинцет ёрдамида тукларни териш. Бу ишни яхшиси ванна қабул қилгач бажаринг, чунки тери бироз бўшашган бўлади. Воск ёки шакарли эпиляция. Бу муолажалар сизни муаммодан 2-4 ҳафтага қутқаради. Бу воситаларни исталган дорихона ва косметологик дўконлардан харид қилиш мумкин. Оқартириш. Водород пероксидининг 6 %ли эритмаси ҳамда нашвадил спиртининг аралашмаси ёрдамида ортиқча тукларни бемалол оқартириш мумкин. Фақат бу воситани қўл терисининг кичик ҳудудига суртиб, аллергияга мойилликни синаш лозим. Шунингдек, бу муолажа териси оқ-сариқдан келган аёлларга тавсия этилади.
Олий тоифали шифокор, дермато-венеролог Бегали ЖУМАНОВ берган маълумотлар асосида Дилноза МИРТОЛИПОВА тайёрлади.
Manba: Zamonaviy.CoM -Saytdan olindi.
Ushbu ma'lumot http://sugdiyona.uz/ dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|