Актриса Шарлиз Терон GQ журнали муқоваси учун суратга тушиб, аёлнинг ёши ҳақидаги фикрлари билан ўртоқлашиб, интервью берди, деб хабар берди "Lady.mail.ru” нашри.
"Аёллар вақт ўтган сари кексаликка юз тутиб, эркаклар эса кундан-кунга ёшариб боради, деган фикр сингиб қолган жамиятда яшаяпмиз. Биз жамият ўзининг нуқтаи назарини ўзгартиришини кутдик, аммо ўзимиз уни ўзгартиришимиз лозимлигини, бунга қурбимиз етишини тушуниб етдим”, – дейди Шарлиз Терон.
Баъзи бир аёллар жамият фикрини ўзгартириш билан овора бўлган вақтда, баъзи бирлари эса 40 ёшида 20 ёшли қиздай кўриниш ҳақида орзу қилади.
"Агар ёш кўринмасанг, ҳеч кимни мафтун этолмайсан”
"Юзимни нима қилсам экан?” деб сўрайди дугонам. Унинг юзига ҳайрон боқаман. Менимча, ёшартирувчи бирор муолажа ўтказмоқчи шекилли. "Нима кераги бор? Юзингни териси одам ҳавас қиладиган даражада силлиқ, вақти-соати келганда бирор нима қиларсан”, дейман ҳайрон бўлиб.
Дугонам 39 ёшга кирганига қарамай, юзи ҳақиқатан ҳам силлиқ, тоза, ажин тушмаганлигидан 30 ёшли аёлни эслатади. Агар сиз ҳам 39 ёшга кирган бўлсангиз, демак 10 йилдан бери фақат ёшариш, ажинлардан терингизни ҳимоя қилиш ҳақида ўйлайсиз. Гўзалликни, жозибадорликни аёллар фақат ёшликда, ёш бўлишда деб ўйлашади. Агар ёш кўринмасанг, демак хунук аёлга айланасан деб ҳисоблашади. Бу аёллар тўқиган энг мудҳиш афсона бўлиб, унга ишонган аёл "ялмоғиз кампир”га айланиши ҳеч гап эмас.
"Пластик жарроҳликдан кейин ҳам ўзгармаган юзлар”
Кўзгуга қарайсиз, юзингиз охирги 10 йил мобайнида қанча жарроҳликни бошидан ўтказмади дейсиз: ботокс, ринопластика, мезотерапия, пилинг, филерлар, биоревитализация ва ҳоказолар...
Илгари юзингиз бошқаларникидан фарқ қилган бўлса, энди у деярли ҳамманики билан бир хил, ўхшаш бўлиб қолган. Бундан Анжелина Жоли ва яна бир танишим мустасно, улар коррекция таъсирида мутлақо ўзгармаган, қолганларники эса ниқоб холос.
Агар пластик жарроҳлик йўли билан юзимни, ёшлигимни сақлаб қоламан десангиз, адашасиз, орадан ўн йил ўтгандан кейин жарроҳликдан фойдаланганингизга афсусланасиз. "Ҳозир ҳеч ким 50 ёшли аёлни кексайган деб ҳисобламайди”
Қанча ҳаракат қилманг, барибир ҳақиқий ёшни яширишнинг иложи йўқ. Ташқи қиёфангиз чиройли кўрингани билан ҳеч ким 50 ёшида 30 ёшли аёлни эслатмайди. Илгарилари 50 ёшли аёл кексайган деб ҳисобланган бўлса, ҳозирда бу қарашлар ўзгариб кетган. Чунки бугунга келиб ёшга нисбатан муносабат ўзгарган. Бу одамнинг ўзига ҳам боғлиқ, агар 50 ёшда кампир қиёфасига киришни, ўзингизни кексайган деб ҳисоблашни истасангиз, марҳамат, атрофдагилар ҳам сизни шундай қабул қилишади. Ҳар доим лаб-лунжингизни осилтириб, дуч келган кийимни эгнингизга илиб олсангиз, ўзингизга қарамасангиз, қарабсизки, кампирсиз!
"Ташқи қиёфанинг ўзи гўзаллик белгиси эмас. Юз терисини торттириш юзга табассум бахш этмайди”
Европанинг ҳар қандай клубига ташриф буюрманг, у ерда 40 ёшдан юқори бўлган аёлларга кўзингиз тушади. Шундай клублардан бири ташкил этган концертда 60 ёшдаги швед аёли билан танишиб қолдим. У Европа бўйлаб сафарга чиққан, шаҳарма-шаҳар кезар, хостелларда тўхтар, жуда фаол ҳаёт кечирар эди.
Ташқи қиёфанинг ўзи ёшлик белгиси эмас. Агар мусиқага, рақсга, дунё бўйлаб сафар қилишга қизиқсангиз, бунинг учун юзингизни торттиришингиз шарт эмас. У сизга қувонч бахш этмайди. Зерикарли бўлган одамлар 20 ёшида ҳам кекса кўринишади, ёшлиги ҳам, ажинсиз юзи ҳам уни қариликдан қутқара олмайди.
"Эркаклар қирқ ёшда ёш кўринади, аёллар эса аксинча...”
Ҳар қандай инсон жинсидан қатъи назар, қирқ ёшида ҳам ботокссиз жуда жозибали кўринади. Эркаклар қирқ ёшида ҳам ёш кўринади, аёллар ансинча деган бемаъни фикрни хаёлдан чиқариб ташлаш лозим. Ёқимтойлик инсоннинг ёшига ҳам, жинсига ҳам боғлиқ эмас.
"Аёллар фақат ёшлик бахт ато этади деб ўйлашади”
Йиллар давомида онгимизга сингиб қолган бу фикрдан воз кечишимиз жуда қийин. Аёллар фақатгина ёшлик, гўзаллик бахт келтиради деб ўйлашади. Кечирасиз, бу хато фикр. Гўзал, жозибадор ва ҳаётга чанқоқ бўлишни орзу қилишнинг ўзи кифоя қилмайди, балки шундай инсон бўлишга ўзимиз ҳаракат қилишимиз лозим.
Manba: Zamonaviy.CoM -Saytdan olindi.
Ushbu ma'lumot darakchi.uz dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|