Бир аёлни билардим.
Майли, исмини ёзмайман.
Ошинга чиқарди.
Менинг даламда ҳам кўп марта ишлаган.
Эс-ҳуши жойида, фақат камгап.
Ҳаётда кўп зулм кўрган бўлса керакки, индамас бўлиб қолган.
У тўйларда идиш-товоқ ҳам юварди.
Қишлоқда иш камайса, шаҳарга иш излаб борарди.
Унинг паспорти йўқлигини ҳам билиб олдим.
Қачонлардир, ўн йиллар нарида паспортини участка нозири олган ва қайтармаган, бу эса сўраб бормаган.
Янги паспорт олишга пул орттиролмаган.
Мен унга: «Янги паспорт олишингга ёрдам бераман, жаримасиниям тўлайман, фақат менга айрим ҳужжатлар олиб кел», дедим.
Лекин у ҳужжатлар олиб келмади.
Уни икки йилдан буён кўрганим йўқ.
Балки ҳозир ҳам паспортсиз яшаётгандир.
Шу аёл букчайиб ишлаб, эшакдек меҳнат қилиб, эрини боқарди.
Эрини ногирон деб ўйладингизми?
Йўқ. Соғлом. Унинг соғлиги ва кучи олдида сиз ва мен ногиронмиз.
Гавдаси йирик. Кўрганлар қассоб бўлса керак деб ўйлайди.
Шундай девкелбат инсон дангаса эди.
Ҳеч қачон ҳеч қаерда ишламаган.
Наша ҳам чекаркан.
Бечора ошин аёл ҳар куни ишга кетаётганда дангаса эрига сигарет ва чойхона паловга, қайнатма шўрвага пул ташлаб келаркан.
Худо урган дангаса эрнинг хотин урадиган феъли ҳам бор экан.
Ярим кечаси ичиб келиб, қаттиқ меҳнатдан чарчаб қотиб ухлаб ётган хотинини оёғидан судраб ураркан.
Бечора аёлнинг доим кўзи ости кўкариб юрарди. Чап кўзидаги кўкариш энди тузалай деганда, ўнг кўзи остида «синяк» пайдо бўларди.
Хуллас, у дўзахда яшаётгандек туюларди менга.
Шу ошин аёлнинг ҳозир қаердалигини билмайман.
Ўтган йили шаҳарда ишлаётганини эшитгандим.
Дарвоқе, унинг турмушга узатадиган ёшга етган қизи ҳам бор эди ва у ҳам баъзан онаси билан далага ишга келарди.
Шу қизнинг ҳам кўзи ости кўкариб юрарди, суриштирсам, дадаси урган бўларди.
Мен бўлсам, ота ўз қизини қанақа қилиб уриши мумкинлигига ақлим етмай бошим қотарди.
Шу ошин аёл ҳозир ҳам дуч келган қора меҳнатни қилиб эрини боқади.
Унинг эрини бир марта кўрганман: гавдали, қорни ҳам катта.
Шу дангаса эр қачон қорни ёрилиб ўларкан деб кутиб юраман.
Ёрилиб қолар.
Қўтир бўлсаям, чўтир бўлсаям, дангаса-ю алкаш бўлса ҳам эр яхши дейсизлар-да, а, аёллар?!
Manba: Zamonaviy.CoM -Saytdan olindi.
Ushbu ma'lumot hordiq.uz dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|