Лаб атрофига чиқувчи герпес (учуқ)лар кўпчилигимизга маълум. Учуқни герпес инфекциялари қўзғатади. Ирим қилишларича, қаттиқ сесканиб қўрққан кишининг лаби атрофида учуқ тошар экан. Бу қараш тиббий жиҳатдан ҳам асосга эга.
Яъни одам қаттиқ қўрққанида иммун тизими бирдан пасайиши ҳисобига инфекция фаоллашади ва учуқ чиқиши кузатилади.
Герпес фақат лаб атрофида тошмай, қовурға орасидаги нерв шохобчаси устидаги терида, жинсий аъзоларда ҳам учраши мумкин. Терининг қайси қисмига чиқишига қараб герпес турлари фарқланади. Бугунги мақолада энг муаммоли тури – жинсий аъзоларда учровчи герпес ҳақида маълумот берамиз. Тиббиётда у генитал герпес деб номланади.
Одам организмида инфекцияларнинг маълум титри бўлиб, қондаги миқдори ошиб кетса, улар фаоллашади ва турли даражадаги касалликларни пайдо қилади. Шунга кўра генитал герпес тошишининг асосий сабаблари қуйидагилар:
• қондаги герпес инфекциясининг титри меъёрдан ошиши;
• иммунитетнинг пасайиши;
• генитал герпеси бўлган бемор билан жинсий алоқада бўлиш, сочиқ, кийимларини алмаштириб ишлатиш, шахсий гигиена қоидаларига амал қилмаслик.
Аёллардаги генитал герпеснинг биринчи белгиси жинсий аъзонинг қалин ва юпқа лабларида ва орқа чиқарув тешиги атрофида қизил доғларнинг пайдо бўлишидир. Орадан бирор соатлар ўтгач, қизил доғлар қичиша бошлайди. Унга таъсир қилинганда ачишади ва ичи рангсиз суюқликдан иборат пуфакчалар ҳосил қилади. Баъзи герпеслар жинсий аъзоларнинг ичида ҳам учраб, уларни ачишиб безовта қилгачгина пайқаш мумкин. Жинсий аъзолар атрофидаги герпес пуфакчалари бир-бирига жуда тиғиз жойлашгани ва теридан кўтарилиб туриши боис, уларни пайпаслаб сезиш мумкин.
Ажралма рангининг ўзгариши, пешоб ажратишда оғриқ ва ачишиш, умумий дармонсизлик, ҳарорат кўтарилиши, қорин соҳасида оғриқлар, пуфакчали тошмалар тошиши ҳам генитал герпес белгиларидир. 10-15 кунда пуфакчалар ёрилиб, ярага айланиши мумкин.
Ташхис қўйишда эса, албатта, қон таҳлили ўтказилади. Инфекция титри аниқланиб, меъёрга келтирилади. Қондан инфекция тозаланмаса ҳам, пуфакчалар ёрилиб, 20-30 кунларда йўқолиб кетиши мумкин. Аммо орадан бир оз фурсат ўтгач, тошмалар қайта-қайта тошавериши кузатилади.
Фарзанд кутаётган аёлларда ҳомиладорлик вақтидаги умумий дармонсизлик, иммунитетнинг пасайиши қондаги герпес титрининг ошиб кетишига сабаб бўлади. Агар ҳомиладор аёл генитал герпесни вақтида даволамаса, ҳомила тушиши, боланинг туғма касалликлар билан туғилиши ёки туғуруқнинг оғир кечишига сабаб бўлади.
Генитал герпеснинг эркалардан кўра аёлларда кўпроқ кузатилиши жинсий аъзоларнинг жойлашуви билан боғлиқ. Эркакларда инфекцияга мойиллик ҳам, инфекция тушиши эҳтимоли ҳам пастроқ бўлса, аёлларда инфекция тушиши ҳолати кўпроқ кузатилади. Бундан ташқари, герпес эркаклардан кўра аёлларга тезроқ юқади.
Мақола дерматовенеролог шифокор билан ҳамкорликда тайёрланди
Manba: Zamonaviy.CoM -Saytdan olindi.
Ushbu ma'lumot dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|