Рўзғор тутишда биз билмаган, ҳатто хаёлимизга ҳам келмаган шундай усуллар бор эканки, эшитиб, ҳайрон қоласан киши. Бугун эътиборингизга таҳририятимизга қўнғироқ қилиб, ўз тажрибалари билан ўртоқлашган тмуштарийларимизнинг тавсияларини ҳавола этамиз. Ким билсин, балки улар билан танишиб, ўзингиз учун бирор янгилик кашф этарсиз.
Озодалик ифори
— Қайнонам «Уйни тозалаганингиздан кейин озодалик ифори уфуриб турсин», деб кўп танбеҳ берарди. «Бундай ифорни қаердан топаман?» деб, анча бош қотирдим. Охири йўлини топдим.
Ҳар гал уйдаги гиламларни чангютгичда тозалагач, полни артиш учун ўзгача рецепт кашф қилдим. Яъни челакдаги сувга озгина кир ювиш кукуни ва ёқимли ифорга эга атиримдан қўшдим. Шу аралашма билан полларни артганимдан сўнг ҳар бир хонадан ўзгача ифор тараладиган бўлди.
Зарина, Тошкент шаҳри
Газ плитасидаги доғлар
— Ёз-куз мавсумида барчамиз қишга тузламаю икралар тайёрлаймиз. Ишни тугатгач, газ печида турли қорамтир доғлар қолади.
Мен бундай доғларни кетказиш учун печ устига қайнаган сув қуйиб, бирор соатлардан сўнг тозалардим. Дугонам бунинг осонроқ усулини ўргатди. Энди кирланган газ печини тозалашдан олдин бироз вақт ёқиб, сўнг юзасига истеъмол содаси сепиб қўяман. Печ усти совимасдан ҳўл латта ва сим дасмол билан осонгина тозалаб оламан.
Дилнавоз, Урганч шаҳри
Чойнакдаги чўкмалар
— Човгун (чой дамлаш учун сув қайнатадиган чойнак) ичида турли чўкмалар ҳосил бўлганда баъзи усуллар ёрдамида осонгина халос бўлиш мумкин. Масалан:
1 литрсувга 2-3 ош қошиқ сиркани аралаштириб, чойнакка солинг ва озгина қайнагач, сувини тўкиб, яхшилаб тозаланг. Бордию чўкмалар жуда қалин бўлиб, сирка ёрдамида тозаланмаса, картошка пўстидан фойдаланиш мумкин. Бунинг учун 2-3 та картошканинг арчилган пўстини ювиб, чойнакка солинг ва эзилиб пишгунича қайнатинг. [ www.BePuL.NeT -Saytdan olindi]
Фарида, Андижон вилояти
Раковинадан сув тошса…
— Ошхонадаги идиш ювиш учун мўлжалланган раковинада тиқин ҳосил бўлиши қувур ифлосланишига ва сув тўпланишига олиб келади. Бундай ҳолатда қуйидаги тезкор чораларни қўллаш мумкин.
Масалан, раковинанинг тешигига озгина истеъмол содаси сепиб, кетидан бир флакон сирка қуясиз. Ярим соатдан сўнг илиқ сув қуйинг. Шунингдек,1 литрқайнаган сувга 2-3 ош қошиқ истеъмол содасини аралаштириб, раковинада сув тўпланишини бартараф этиш мумкин.
Муҳайё, Шаҳрисабз тумани
Қорайган қозонни оқартиришнинг осон усули
— Овқат пиширадиган қозон қорайиб кетган бўлса, уни оқартириш учун кўпчилик газ печи устига ёки ичига қўяди. Илгари мен ҳам шундай қилардим. Ёқимсиз ҳиди, тутунидан безор бўлиб, қозонни оқартиришнинг бошқа йўлини изладим. Топдим ҳам. Ҳозир қозонимни сувда қайнатиб, осонгина оқартираман.
Бунинг учун оқартириш керак бўлган қозонингиз тўлиқ ботиб турадиган катта идиш керак. Шу идишга оқартириладиган қозон бутунлай ботиб турадиган қилиб сув қуйинг. Ичига қирғичдан чиқарилган битта кир совун ва 2-3 та суюқ елим (қоғоз ёпиштирадиган) ва кирланган қозонни солиб, қайнатинг. Охирида сим дасмол билан осонгина ювиб оласиз. Битта шарти — елим қанча сифатли бўлса, қозон шунча тез оқаради.
Нигина, Зангиота тумани
Жалюзини тозалаймиз!
— Жалюзиларнинг йирик ўлчамдагисини оддий нам матода ҳам тозалаш мумкин. Бироқ кичик ва ингичка кўринишдагисини мато билан яхши тозалай олмайсиз.
Жалюзи тасмаларини бир текисда артиб, чангдан тозалашда яроқсиз, ишлатилмайдиган пайпоқдан фойдаланишингиз мумкин. Бунда пайпоқни қўлга кийиб, бироз намланг. Сўнг жалюзи тасмасини бир бошидан иккинчи томонга қарата артинг. Бу усул билан ишингиз тез ва осон битади. [ www.BePuL.NeT -Saytdan olindi]
Нигора, Тошкент вилояти
Замш сумканинг рангини янгилаш учун…
— Майдаланган қаҳвани жуда оз миқдорда сув билан аралаштириб, жигарранг замш сумкаларнинг рангини янгилаш мумкин.
Бунда қаттиқроқ чўткани қаҳва дамламасига ботириб, сумка матоси бўйлаб юргизилади. Шунингдек, қора рангли пойабзал ва чарм сумкаларни ҳам мазкур усул билан тозалаш мумкин.
Зарнигор, Наманган шаҳри
Сиёҳ доғини кетказамиз!
— Қатиқ ёрдамида кийим ва мебеллардаги сиёҳ доғини кетказиш мумкин.
Бунинг учун либоснинг сиёҳ теккан қисмини қатиқ билан артинг ва бир неча дақиқага қолдиринг. Сўнг илиқ сувда чайсангиз, доғдан асар ҳам қолмайди.
Мафтуна, Бўка шаҳри
Самира УЛУҒБЕКОВА тайёрлади