Боласининг чекаётганига кўзи тушган ота-она жаҳл отига миниши табиий. Аммо унутманг, сизнинг жаҳлингиздан қўрқиб, чекишга журъат қилган бола ундан воз кечмайди. Шунинг учун у чекишни одат қилмаслигини учун қуйидаги сабаблар билан танишиб чиқинг.
1-сабаб: Қизиқувчанлик.
«Бир марта чекиб кўрай, қани, нима экан бу?», деб ўйлайди у. Ва бир марталик истак, бора-бора зарарли одатга айланади.
Нима қиламиз?
Унинг қизиқишлари доирасини кенгайтиринг. Масалан, агар истаги бўлса, соҳангизга қизиқтиринг.
2-сабаб: Ўзини катта одамдек ҳис қилмоқ.
Эътибор беринг, ўғлингиз ўн беш-ўн олти ёшга қараб кетган-у, аммо сиз ҳамон унга ёш боладек муомала қиласиз. У ёши улғаётган бўлса-да, уйда ўз ўрнини ҳис қилмайди. Чегараларни бузишни истайди. Ва осон йўли, чекишни танлайди.
Нима қиламиз?
Имкон беринг, у катта бўлганини чекиш орқали эмас, бошқа йўллар билан исботласин. Рўзғор қилишни ўргатинг, уй таъмири ёки бирор катта харид борасида фикрига қизинг. Катталардек муносабатда бўлинг.
3-сабаб: Чекиш «мода» деб билади.
Кинода, кўча-кўйда ўзига бино қўйган, кўркам кишиларнинг чекишини кўради. Ва бу эркакка ўзгача кўрк бағишлайди деб ўйлайди.
Нима қиламиз?
Айни шундай саҳналарга кўзингиз тушганида, унга йўл-йўлакай, аслида бу жуда хунук кўринишини тушунтириб ўтинг. Токи у чекиш орқали статусини оширмасин.
4-сабаб: «Дўст»лар давраси.
Одам ёшлигида атрофида дўсти кўп бўлишини истайди. Тенгдошлари даврасига қўшмай қўйишидан жуда қўқрқади. Чекиш орқали атрофдаги болалар билан яқинлашишга интилади.
Нима қиламиз?
Масъулиятлироқ бўлинг. Ким билан ўртоқ бўлаяпти, улар қанақа йигитлигига қизиқинг. «У бола ёмон, унга яқин юрма» қабилида қаттиқ гапирмасдан, одамларин сигерата эмас, меҳр-оқибат бирлаштиришин тушунтиринг. Бирор ўртоғининг муаммоси бўлса, бирга ҳал қилишинг. У хулоса қилсин.
5-сабаб: Ўзингиз – «ўрнак».
Бирор муаммо юз берса, дарров сигерата тутатишингиз, бемалол уйда, оила даврасида чекишингиз, асабингизни шу билан тинчлантиришингиз, болага таъсир қилади. Ва қуш уясида кўрганини қилади.
Нима қиламиз?
Демак, ҳаммаси аввало ўзингизга боғлиқ! Бу зарарли одатдан ўзингиз халос бўла олмаяпсизми? Ҳеч бўлмаса, болаларингиз асранг. Уларни кўз олдида чекманг.