Бир муддат кўринмай қолган хонанда Замзама нима сабабдан ижодий танаффусда эканлигини аниқладик. Қаҳрамонимиз иккинчи бор оналик бахтига мушарраф бўлиб, бугун қизалоқлари тарбияси ва парвариши билан банд экан. Катта қизи Асал беш ярим ёш, кичиги Гўзал эса ўн ойлик бўлибди.
«Биринчиси синов, иккинчиси тажриба экан!»
— Биринчи фарзандимга ҳомиладорлигимда ижодий сафарлар борми, концерт дастурларими, қатнашаверардим. Шунинг учун ҳам туғруқ вақти бироз қийналдим. Кичигимга ҳомиладорлигимда эса тажрибам бор-да, ўзимни эҳтиёт қилдим. Кўпчилик фарзанд кутаётганимни билмади ҳам.
«Ука олиб келайми ёки сингилча?»
— Катта қизим эркароқ. Оиламизда чақалоқ пайдо бўлишини қандай қабул қиларкан, деб ўйланардим. Рашк қилса-чи, инжиқланса, нима қиламан, дердим-да. Бир кун бағримга босиб, тушунтирдим: «Уканг ёки синглинг бўлса, сени яхши кўради. Бирга ўйнайсизлар» деб. Чақалоқ келишини эшитиб, хурсанд бўлди. Шу-шу кўзим ёригунча эрталаб синглиси билан ғойибона саломлашадиган, кечқурун эса ҳайрли тун тилаб ухлайдиган одат чиқарди. Қизларимнинг бир-бирига меҳрибончилигини кўриб, бола она қорнида ҳаммасини эшитади, деганлари рост экан дейман.
«Тўнғич фарзанд тез улғаяркан...»
— Кенжатойим билан туғруқхонадан уйга келганимда Асални кўриб, «Қизим катта бўлиб қолибди», дегандим. Атрофимдагилар «Қўлингда чақалоқ бўлганига шундай кўринаяпти», дейишган ўшанда. Лекин чиндан ҳам тўнғичим анча улғайган. Гўзал эса шунақанги тўполончи бўлган, асти сўраманг. Олти ойлигида эмаклади, ўн ойлик бўлгач, юриб кетди. «Ойи», «дада», «бер» деган сўзларни айтаяпти. Іозирдан ўзиникини маъқуллайди. Болалар майдончасига борсак, ўзидан катталарнинг сочидан тортиб, шумлик қилади.
«Энг эзгу ниятим...»
— Ўзим оилада ёлғиз фарзандман. Опа-сингиллар, ака-укаларнинг самимий муносабати, аҳиллигига доим ҳавас қилганман. Истардимки, қизларим ҳам шундай оқибатли бўлишсин. Асалга «Битта конфетинг бўлса, ярмини синглингга олиб қўй, у ҳам катта бўлса, шундай қилади», деб ўргатаман. Кичиклигидан бир-бирини ардоқлаб катта бўлишларини хоҳлайман-да.
«Оналик аёлни ўзгартирар экан...»
— Фарзандларимни энагага топшириб, ижодга қайтишни хоҳламадим. Бунинг устига, кичигим хали эмизикли.Тўғри, бекор ўтирганим йўқ. Бир ой аввал болалар учун рақс тўгараги ташкил қилдим. Іафтасига уч марта машғулот ўтаяпман. Бир нечта қўшиқларим тайёр бўлди. Югур-югурлар билан кун тартибимни режага солаяпман. Аммо ҳар қандай шароитда ҳам биринчи ўринда қизларим туришади. Чунки улар менинг мислсиз хазинам! Тўғриси, ёшингиз улғайгани сари оналик туйғусини чуқурроқ англаркансиз. Бу даврни бошқа нарсаларга алмашишга кўзингиз қиймас экан. Ҳар қалай менда шундай бўлди.
Самира УЛУҒБЕКОВА тайёрлади.
Manba: Zamonaviy.CoM -Saytdan olindi.
Ushbu ma'lumot dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|