Шу йилнинг сентябрь ойида хитойлик машҳур киноактёр Жеки Чаннинг ўғли, яна бир актёр Жейси Чан Пекиннинг Дунчен туманидаги уйида гиёҳванд модда қабул қилаётганида полиция қўлига тушган эди. Воқеа жойида у билан яна бир тайванлик ёш актёр Кай Ко ҳам бўлган, уйдан 100 грамм миқдоридаги марихуанна моддаси топилган эди.
Тайванлик Кай Ко 2 ҳафта ҳибсда сақлангач, айби исботланмай қўйиб юборилган, лекин, Жеки Чаннинг 32 ёшли ўғли Жейси Чан 3 ойдан бери терговда эди. У эндиликда уйида гиёҳвандлик моддаларини сақлаш ҳамда уйида бангихона ташкил этганликда айбланмоқда. Бу ҳақида "Синьхуа” ахборот агентлиги хабар бермоқда.
Хабарда айтилишича, ушбу жиноятчини 3 йиллик қамоқ жазоси кутмоқда.
Хитойлик журналистлар унинг отаси Жеки Чандан ўз ўғлига ёрдам бериш учун ҳукумат раҳбарларидан авф сўраши мумкинми деб сўраганларида, Жеки Чан бу ҳолатда ҳеч қанақа чора кўрмаслигини билдириб ўтган.
"Ҳозирги вазиятда кичик Чанга ёрдам беришнинг ҳеч қандай йўли йўқ. У турмада керакли муддат давомида ўтириб, қилган ишига пушаймон бўлсин ва озодликка чиққач, бошқа одамларга ўзининг аччиқ тажрибаси ҳақида гапириб берсин”, – дейди Жеки Чан.