Қорақалпоқ заминидан азалдан бетактор истеъдодлар ватани бўлиб келган. Ўзбекистонда хизмат кўрсатган артисти Женисбек Пиязов ҳам ана шундай иқтидорли ёшлардан бири. Женисбек билан суҳбатимиз концерт бериш учун Қозоғистоннинг Остона шаҳрига жўнаб кетаётган пайтига тўғри келди.
- Женисбек, операни мусиқа санъатининг энг мураккаб турларидан бири дейишади. Санъатнинг ушбу йўналишини танлашингизнинг сабаби нима?
- Аввало, санъатга меҳр қонимда бор. Чунки бобом Ўзбекистонда хизмат кўрсатган артист, Қорақалпоғистон халқ артисти Зинел пиязов узоқ йиллар Бердақ номидаги Қорақалпоқ давлат мусиқали театрида фаолият кўрсатган, ўзига хос овоз соҳиби бўлган. Шу сабабли бўлса керак, дастлаб Нукус Маданият ва санъат коллежида, айни пайтда эса Ўзбекистон Давлат консерваториясида таҳсил оляпман. Қолаверса, Қорақалпоқ заминидан жуда кўп опера хонандалари етишиб чиққан. Кўп эътибор қилганман. Биз томонда одамлар алақандай баланд,йўғон товушда гапиришади. Бу овоз опера талабларига мос. Шунинг учун қорақалпоқларнинг ҳар бирида опера хонандалиги бўйича салгина бўлса ҳам иқтидор бўлса керак, деб ўйлайман (кулади).
- Опера учун овозни жуда эҳтиёт қилиш керак, дейишади, тўғрими?
- Билмадим. Мен шахсан, овозимни эҳтиёт қилиш учун ҳаракат ҳам қилмайман. Кўнглим тусаган нарсани ейман. Совуқдан ҳам унча қўрқмайман. Шу пайтгача овозимга бирор зарар етган пайтни эслолмайман.
- Одатда опера хонандалари хийла гавдали бўлишарди.
- Тўғри, анча озғинман (кулади). Лекин сизнинг фикрингизга қўшилолмайман. Овоз билан инсоннинг вазни ўртасида бирор боғлиқлик бор деб ўйламайман.
- Операнинг ихлосмандлари эстрада ё бошқа йўналишларнинг мухлисларига нисбатан камчиликни ташкил этади.
- Инсон ўзи хоҳлаган, ўзи тўғри деб билган йўлдан бориши керак. Шахсан мен эстрада йўналишида ҳам, ҳатто реп, рок йўналишларида ҳам кйлаб кўрдим. Лекин ўзимни операда топдим. Устозларим ҳам шу йўлни маслаҳат беришди.
- Ҳаётингизда энг катта бурилиш ясаган воқеани айта оласизми?
- 2007 йилда ёш опера ижрочиларининг республика кўрик-танловида биринчиликни эгаллагандим. Шу ғолиблик сабабли консерваторияга ўқишга имтиҳонсиз қабул қилиндим. Кўпгина мамлакат ва халқаро миқёсдаги кўрик-танловларда иштирок этиб келяпман. Хусусан, 2012 йилда Москвада ўтказилган Муслим Магомаев номидаги операчилар танловида гран-прига сазовор бўлганман. Ҳолбуки, бир аввал ва бир йил кейин ушбу танловда бу юксак мукофотни ҳеч ким ололмаган.
- Шунинг учун ҳам ўғлингизнинг исмини Муслим деб қўйган экансиз-да?
- Тўғри, бундан ташқари машҳур хонанда Муслим Магомаев ижодига қизиқишим ва ҳурматим баланд. У ижро этган қўшиқларни мароқ билан тинглайман.
-2 3 ёшингизда Қорақалпоғистонда хизмат кўрсатган артист, 25 ёшда Ўзбекистонда хизмта кўрсатган артист унвонларига сазовор бўлдингиз. Ўзингизни омадли эканингизга ишонасизми?
- Албатта. Омад аслида нима? Бу керак пайтда, керак жойда бўла олиш демакдир. Менимча бу ишни уддалай оляпман. Сизга бир мисол айтаман. Талабалик пайтимизда ётоқхонамизда шанбалик ўтказилди. Ҳамма курсдошлар кун бўйи тиним билмай ишлашди. Мен эса, бир танловга тайёргарлик кўраётгандим. Шундай бўлса-да, хонамизда бир гиламчани қоқиб келиш учун пастга тушгандим. Ҳовлида деканимизни кўриб қолдим. Ўша куни кечқурун мажлис бўлди. Кун бўйи терга ботган курсдошларимиз қолиб, асосий мақтовни мен эшитганман (кулади).
- Хорижий мамлакатларда кўп бўласиз. Ватан соғинчини бошқалардан кўпроқ ҳис этсангиз керак.
- Албатта, бу соғинч самолёт ердан узилиши билан бошланади. Шу пайтга қадар дунёнинг ўндан ортиқ мамлакатида бўлдик. Турфа одамлар билан ҳамсуҳбат бўлганман. Дунёдаги ҳеч бир мамлакат бизнинг она юртимизга тенг келолмайди. Бизнинг халқимизга хос меҳр-оқибат, меҳмондўстлик, инсонпарварлик хислатларини бошқа ерда учратиш қийин. Юртимизнинг ҳар қарич ери олтинга баробар. Бу заминда етиштирилган ноз-неъматларни Ер юзининг бошқа минтақаларида учрамайди.
- Юртимиздаги улкан ўзгаришларни кўриб, кўпинча дилимиздан "кеча ким эдигу, бугун ким бўлдик?” деган савол ўтади.
- Мен Собиқ тузумнинг сўнгги йилларида туғилган бўлсам-да, истиқлол даврида эсимни танидим, ўсиб-улғайдим. Юртимизнинг собиқ тузум давридаги ҳаётини катта авлод вакилларининг ҳикояларидан эшитиб ўрганганман. Айнан истиқлол даврида камол топганим – Катта ютуғим. Акс ҳолда мен ҳозиргидек улкан ғалабаларни қўлга киритолмасдим. Дунёнинг нуфузли саҳналарида Ўзбекистон фарзанди сифатида ўз кучим ва имкониятларимни намоён этолмасдим.
- Агар дунёнинг энг машҳур шаҳарларида яшаб ижод қилиш учун қулай имконият туғилса...
- Бунақа имконият кўп бўлди. Лекин, мен учун бирор бир мамлакат, бирор шаҳар она юртимнинг ўрнини боса олмайди. Бу ерда ўқиш, ижод қилиш, яшаш учун барча шароитлар муҳайё. Шу боис бу борадаги таклифларни рад этганман.
- Она шаҳрингиз Нукусга тез-тез бориб турасизми?
- Талабалик пайтимда кўпроқ борардим. Баъзан ота-онам ҳам "ҳадеб келаверма, болам, йўл узоқ, ўқишинг қоп кетмасин” деб танбеҳ беришарди (кулади). Ҳозир ўқиш, ижод, гастроллар... Лекин вақт топдим дегунча албатта бораман. Тошкентда кўпроқ турсам Нукусни, Нукусда кўпроқ қолиб кетсам, Тошкентни соғина бошлайман. Ҳар икки шаҳар мен учун қадрдон. Нукусда киндик қоним тўкилган бўлса, Тошкентда билим олим, камол топдим, юксак натижаларга эришдим.
- Кечаги ва бугунги кунингизни солиштириб кўрасизми? Кеча ҳамма қатори оддий йигит эдингиз, бугун эл таниган санъаткор... Юриш-туришингизда, феъл-атворингизда бирор ўзгариш сезасизми?
- Менимча, мен ўша-ўша Женисбекман. Муомалам ҳам, юриш-туришим ҳам ўзгаргани йўқ. Ўша пайтда кимни дўст деб билсам, ҳозир ҳам дўстона муносабатдаман. Бетгачопарлигим бор. Шу боис, кўнглимга ёқмаган одамлар билан шартта алоқани узаман қўяман.
- Лекин бу одат инсонга кўп ҳолларда панд беради.
- Рост, бу феълим менга панд берган пайтлар ҳам бўлган. Болалигимда ҳам кўпчилик тенгдошларим билан келишолмасдим. Кўп жанжаллашардим. Буни юзимдаги сезилар-сезилмас чандиқлар ҳам тасдиқлайди (кулади). Лекин, нима қилай? Бу феълимни ўзгартиролмайман-да?
- Бугун таниқли хонандалар орасида ўзини кинода синаб кўрмаганлар йўқ ҳисоби. Сизга ҳам таклифлар бўлгандир?
- Ҳозирча таклиф бўлгани йўқ. Лекин бўлса йўқ демасдим. Ҳар қалай опера санъати актёрлик маҳоратини ҳам талаб этади. Опера хонандалари учун алоҳида актёрлик маҳорати дарслари ҳам ўтилади. Кинода роль ўйнаш қўлимда келса керак деб ўйлайман.
-О пера қўшиқлари кўпинча бошқа тиларда куйланади. Сиз ушбу тиллардан хабардормисиз?
- Хорижий саҳналарда асосан итальян тилидаги партияларни ижро этаман. Албатта ҳар бир сўзнинг талаффузига ва маъносига эътибор қаратаман. Тушунмаган сўзларимнинг маъносини электрон луғатлар ёрдамида билиб оламан. Шунингдек, ўзбек, қорақалпоқ тилидаги партияларни ҳам кўп ижро этаман.
- Охирги маротаба йиғлаган пайтингизни эслай оласизми?
- Йўқ, эслолмайман. Бироқ воқеадан қаттиқ таъсирланишим мумкин. Лекин, унча-мунчада кўзимга ёш келмайди. Ўта таъсирчан саҳналарни ижро этганимда ҳам кўзимга ёш келмайди. Чунки, операчи йиғлаши эмас, йиғлатиши керак.
- Сиз ўзингизга кўзлаган чўққини забт эта олдингизми ё ҳали олдинда бундан ҳам катта режалар борми?
- Ойни кўзласанг чўққига чиқасан, дейишади. Аввал, шу қадар юксак мукофотларга лойиқ кўрилганим учун муҳтарам Юртбошимиздан миннатдорман. Бу ишончни оқлаш учун ҳали жуда кўп изланишим, юртимиз шон-шарафини янада юксаклага кўтаришим учун ҳали кўп изланишим лозим. Жаҳонда машҳур "Метрополитен”, Ла Скала” опера театрларида концерт бериш ниятим бор.
- Барча орзу ва мақсадларингиз амалга ошишига тилакдошмиз.
Р.Жабборов суҳбатлашди
Manba: Zamonaviy.CoM -Saytdan olindi.
Ushbu ma'lumot dan olindi! < ! > DO'STLARINGIZGA YUBORING:
Quyidagi yangiliklarni o'qing dod devorasiz:
|